Voëlkykplekke - Vaalkopdam en Noordwes Voëlreservaat
Klub Voordele	Oor Voëlkyk	Komiteelede	Klubprogram	Nuus	Voëlkykplekke	TUIS

deur Etienne Marais

Vaalkopdam lê in die Noordwes Provinsie, tussen Brits en Pilanesberg. Die watervlak van die Vaalkopdam, wat in die Elandsrivier geleë is, was tot 1996 baie laag en het bekendheid verwerf vanweë die groot getalle watervoëls, wat skaars swerwers ingesluit het. Habitatte soos vlaktes langs die dam (tans onder water), redelike oop savanne en landerye lok 'n verskeidenheid grasveldspesies. Boomveldhabitat word deur akasia gedomineer, met breëblaarboomveld na die weste in 'n gebied wat nou by die Noordwes Parke Voëlreservaat ingesluit is. Weerskante van die damwal is daar twee koppies, waarvan die grootste aan Vaalkop sy naam besorg. Die dam het die afgelope tyd baie gewild onder vissermanne geword en dit, tesame met die hoë watervlakke maak dit die plek bietjie meer "oorbevolk" as voorheen. Dit bly egter 'n toeganklike voëlkykarea van hoë gehalte en ervare voëlkykers kan verwag om in die somer in die omgewing van 150 spesies per dag aan te teken.

Voëls

Groot watervoëls wat gewoonlik teenwoordig is sluit Reuse -, Grootwit- en Rooireier, Nimmersat en Lepelaar in. Waterdikkop, Swartreier (somer), Groenrugreier, Kuifkopdobbertjie en Kaapse Slopeend kan ook gesien word. Waadvoëls (somer) sluit in Krombekstrandloper, Ringnekstrandkiewiet en soms Steenloper.

In die bosveld rondom die dam word Rooiborslaksman, Gebande Sanger, Koningblou- en Swartwangsysie, Kalahariwipstert en Kaapse Kapokvoël gevind. Somerbesoekers sluit in Spotvoël, Blouwangbyvreter, Bosveld- en Dwergvisvanger. Na goeie reëns is Bosveldlewerik baie opmerklik. Roofvoëls mag goed verteenwoordig wees en sluit in Vis-, Witkruis-, Bruin- en Grootjagarend. Visvalk word ook gereeld gesien.

Vaalkop Permitte is van Nick en Amy Bezuidenhout beskikbaar. Tel 01211-771627 Cell 083 765 1704

Club Benefits	About Birding	Contacts	Events	News	Birding Spots	HOME
Klub Voordele	Oor Voëlkyk	Komiteelede	Klubprogram	Nuus	Voëlkykplekke	TUIS
© BirdLife Northern Gauteng - a proud member of the BirdLife family.